काठमाडौं। सोमबार बिहानैदेखि विभिन्न हिन्दुवादी सङ्गठनहरूले विरोध प्रदर्शन सुरु गरेपछि वीरगञ्ज महानगरपालिका क्षेत्र आज फेरि तनावग्रस्त बनेको छ। धनुषामा भएको मस्जिद तोडफोडको घटनालाई लिएर आइतबार मुस्लिम समुदायले प्रदर्शन गरेको थियो।
त्यसको विरोधस्वरूप तथा हिन्दु देवीदेवतामाथि अभद्र र आपत्तिजनक टिप्पणी गरिएको भन्दै सोमबार बिहान हिन्दुवादी सङ्गठनहरू प्रदर्शनमा उत्रिएका हुन्। हिन्दु धर्मबारे अफवाह फैलाउने र अपमान गर्नेहरू विरुद्ध कारबाहीको माग गर्दै सङ्गठनले विरोध प्रदर्शन गरेको अगुवाहरूले बताएका छन्।
पर्सा प्रहरीका अनुसार अहिले मुस्लिम समुदाय र हिन्दु समुदाय दुवैले वीरगञ्जमा एक अर्काविरुद्ध प्रदर्शन गरिरहेका छन्। दुवै समुदाय आमुन्नेसामुन्ने भएर प्रदर्शनमा उत्रिएपछि सुरक्षा व्यवस्था कडा पारिएको छ। सम्भावित झडपलाई मध्यनजर गर्दै प्रहरीले वीरगञ्जको मकालु चोकमा प्रवेशमा रोक लगाएको छ।
जिल्ला प्रहरी कार्यालय पर्साका प्रवक्ता राजु कार्कीले मकालु चोकबाट मुस्लिम बसोबास रहेको बस्ती छपकैयातर्फ जान रोक लगाइएको र छपकैयाबाट मुख्य बजारतर्फ आउन पनि बन्देज लगाइएको जानकारी दिए। प्रदर्शन उग्र बन्दै गएपछि जिल्ला प्रशासन कार्यालय पर्साले स्थितिलाई सामान्य बनाउन पहल थालेको छ। प्रशासनले निकास खोज्नका लागि हिन्दुवादी सङ्गठनका प्रतिनिधिहरूसँग छलफल सुरु गरेको जनाएको छ।
