काठमाडौं। राष्ट्रिय स्वतन्त्र पार्टी (रास्वपा)का सभापति रवि लामिछानेले र काठमाडौं महानगरका मेयर बालेन साहले २ घण्टा लामो वार्ता गरेका छन्। मेयर शाहका सल्लाहकार कुमार बेनको कुण्डोलस्थित निवासमा बिहीबार २ घण्टा छलफलपछि लामिछानेले वार्ता सकारात्मक रहेको बताउदै बाहिरिएका हुन्।
बालेनले चुनाव चिन्ह लौरो रहेको देश विकास पार्टीमार्फत नयाँ शक्तिहरू एक ठाउँमा आउन प्रस्ताव गरेका थिए। ‘लौरो टेक्ने कि घण्टी बजाउने?’ भन्ने प्रश्नमा लामिछाने भने, ‘वार्ता राम्रो भयो । समयले बताउला ।’ बिहीबारको वार्ता सकारात्मक रहेको रास्वपाका अर्का एक नेताले बताए । ‘सोमबार एक चरणमा कुरा भएको थियो, बिहीबार मन माझेर कुरा भएको छ । वैकल्पिक नयाँ शक्तिहरू मिल्नुपर्छ भन्नेहरूलाई सकारात्मक सन्देश दिन्छौं,’ रास्वपाका एक प्रभावशाली नेताले लोकान्तरसँग भने ।
लामिछानेसँगको भेटअघि बालेनले ऊर्जामन्त्री एवं उज्यालो नेपाल पार्टीका अवधारणाकार कुलमान घिसिङसँग भेट गरेका थिए । बालेनले कांग्रेसका पूर्वसांसद डा. सुनिल शर्मा, स्वतन्त्र सांसद डा. अमरेशकुमरा सिंहलगायतसँग पनि छलफल गरेका छन् ।
