काठमाडौं । देशका धेरै स्थानमा आज (साउन २८) वर्षाको पूर्वानुमान छ । कतिपय ठाउँमा भारी वर्षाको सम्भावना रहेको मौसम पूर्वानुमान महाशाखाले जनाएको छ । यस दिन अपराह्न र साँझ काठमाडौं उपत्यका र वरिपरि ‘ठूलो’ वर्षाको सम्भावना रहेको पर्यावरण एवं मौसमविद् उज्ज्वल उपाध्यायले औँल्याएका छन् । “रातिको समयमा मुग्लिन–पोखरा–बेनी राजमार्गको ५० किमि उत्तर र १० किमि दक्षिणसम्मको क्षेत्रभित्र भारी वर्षा र आजै राति कर्णाली (जुम्ला, कालीकोट, सुर्खेत, जजरकोट, दैलेख, अछाम) क्षेत्र र वरिपरि ठूलो वर्षा देखिन्छ,” उनले सामाजिक सञ्जाल फेसबुकमा लेखेका छन् ।
यी क्षेत्रमा शुक्रबार (साउन २९) बिहानसम्म अत्यावश्यकबाहेक लामो दूरीको यात्रा नगर्न उनले सुझाव दिएका छन् ।
दिउँसो मध्यम, राति धेरै भारी वर्षाको सम्भावना
त्रिभुवन विश्वविद्यालयको जल तथा मौसम विज्ञान केन्द्रीय विभागका सहप्राध्यापक डा. विनोद पोखरेलले पनि कोसी र मधेसका थोरै ठाउँमा तथा अरू प्रदेशका अधिकांश स्थानमा वर्षाको ‘राम्रो’ सम्भावना रहेको जनाएका छन् ।
“आज दिउँसोदेखि नेपालभरि वर्षा हुने देखिन्छ, कोसी र मधेसको थोरै ठाउँमा र अरू प्रदेशको अधिकांश ठाउँमा वर्षाको राम्रो सम्भावना छ,” उनले फेसबुकमा लेखेका छन्, “पश्चिम नेपालको पहाडी भेगमा भारी वर्षाको सम्भावना छ बेलुकादेखि भोलिसम्म (वाग्मतीदेखि सुदूरपश्चिमसम्म) ।” हाल देशभर मनसुनी वायुको प्रभाव छ । “हाल मनसुनको न्यूनचापीय रेखा सरदर स्थानको आसपास रहेको छ,” महाशाखाले भनेको छ ।
