सुवास घिमिरे/ काठमाडौं । आधुनिक बैंकिङ प्रणाली नाफामुखी मात्र नभई दिगो विकास र सामाजिक उत्तरदायित्वसँग जोडिएको हुनुपर्छ भन्ने मान्यतालाई ग्लोबल आइएमई बैंक लिमिटेडले आत्मसात् गरेको छ। बैंकले आफ्ना कर्जा र लगानी निर्णयमा पर्यावरणीय तथा सामाजिक प्रभावलाई ध्यानमा राख्दै आएको छ। हरित ऊर्जा, जलविद्युत्, कृषि र वातावरणमैत्री परियोजनामा लगानी गर्दै बैंकले दिगो विकासलाई प्रोत्साहन गरेको छ।
सामाजिक उत्तरदायित्व अन्तर्गत शिक्षा, स्वास्थ्य, विपद् राहत, वातावरण संरक्षण र सामुदायिक विकासका क्षेत्रमा बैंकको योगदान उल्लेखनीय छ। छात्रवृत्ति, स्वास्थ्य शिविर, वृक्षरोपण र विपद् सहयोग कार्यक्रमहरूले बैंकलाई समुदायसँग जोडेको छ। डिजिटल बैंकिङको विस्तारले कागजको प्रयोग घटाउँदै वातावरण संरक्षणमा समेत योगदान पुगेको छ। यसले बैंकिङलाई आधुनिक मात्र होइन, जिम्मेवार पनि बनाएको छ।भविष्यमा बैंकले हरित वित्त, दिगो लगानी र सामाजिक प्रभावमुखी बैंकिङलाई अझ प्राथमिकतामा राख्ने स्पष्ट दृष्टिकोण लिएको छ। यसले बैंकलाई केवल वित्तीय संस्था होइन, समाज परिवर्तनको साझेदारका रूपमा स्थापित गरेको छ।
रेमिट्यान्सदेखि राष्ट्रिय पूँजी निर्माण
विश्वका प्रमुख मुलुकहरूमा फैलिएको बैंकको अन्तर्राष्ट्रिय साझेदारीले वैदेशिक रोजगारीमा रहेका नेपालीलाई सहज र सुरक्षित रेमिट्यान्स सेवा उपलब्ध गराएको छ। रकम प्राप्त मात्र होइन, त्यसलाई बचत, लगानी र उद्यमशीलतामा रूपान्तरण गर्ने वातावरण बैंकले तयार गरेको छ।
रेमिट्यान्स प्राप्त गर्ने परिवारलाई लक्षित गरी बैंकले विशेष बचत योजना, बीमा, कर्जा र लगानी सम्बन्धी परामर्श सेवा पनि प्रदान गर्दै आएको छ। यसले रेमिट्यान्सलाई उपभोग मात्र होइन, दीर्घकालीन आर्थिक आधार बनाउने दिशामा सहयोग पुयाएको छ।
व्यापार तथा उद्योग क्षेत्रमा बैंकको लगानीले राष्ट्रिय पूँजी निर्माणमा योगदान पुगेको छ। आयात–निर्यात व्यवसाय, जलविद्युत्, पर्यटन, पूर्वाधार र उत्पादनमूलक उद्योगमा बैंकको सहभागिताले रोजगारी सिर्जना र आर्थिक वृद्धिमा सकारात्मक प्रभाव पारेको छ। सन्तुलित र जिम्मेवार बैंकिङ अभ्यासमार्फत ग्लोबल आइएमई बैंकले रेमिट्यान्सलाई अर्थतन्त्रको कमजोर कडी होइन, सशक्त आर्थिक स्रोतको रूपमा विकास गरिरहेको छ। आज ग्लोबल आइएमई बैंक वित्तीय समावेशीताको अभियानमा अग्रणी भूमिका निर्वाह गर्दै “बैंक सबैका लागि” भन्ने अवधारणालाई व्यवहारमा उतारिरहेको छ।
