काठमाडौं । नेपाली बजारमा बिहीबार (वैशाख १७) सुनको मूल्य घटेको छ । सुनको मूल्य तोलामा एक हजार ८०० रुपैयाँले घटेको नेपाल सुनचाँदी व्यवसायी महासंघले जनाएको छ । यस दिन छापावाल सुनको मूल्य तोलाको दुई लाख ९२ हजार ७०० रुपैयाँ कायम छ । बुधबार (वैशाख १६) छापावाल सुन प्रतितोला दुई लाख ९४ हजार ५०० रुपैयाँमा किनबेच भएको थियो । त्यसअघिका दुई कारोबार दिनमा छापावाल सुन तोलामा क्रमशः तीन/तीन हजार रुपैयाँले घटेको थियो ।
चाँदीको मूल्य पनि तोलामा १०५ रुपैयाँले घटेको छ । ग्राहकले एक तोला चाँदी खरिदका निम्ति चार हजार ८१० रुपैयाँ खर्च गर्नुपर्ने महासंघले जनाएको छ । बुधबार चाँदी प्रतितोला चार हजार ९१५ रुपैयाँमा कारोबार भएको थियो ।
