काठमाडौं । इटालियन क्लब एट्लान्टाले मुख्य प्रशिक्षक इभान जुरिकलाई बर्खास्त गरेको छ । एट्लान्टाले जुरिकलाई सन् २०२७ सम्मका लागि प्रशिक्षक नियुक्त गरेको थियो । तर, सोमबार खराब प्रदर्शन गरेको जनाउँदै एट्लान्टाले नियुक्त गरेको तीन महिनाभित्रै बर्खास्त गरेको हो ।
जुरिकलाई मुख्य प्रशिक्षकबाट हटाएसँगै एट्लान्टाले जारी गरेको विज्ञप्तिमा भनिएको छ, “एट्लान्टा जुरिक र जुरिकका स्टाफहरूलाई धन्यवाद व्यक्त गर्दछ ।” जुरिक गत जुनमा टिमको मुख्य प्रशिक्षक नियुक्त भएका थिए । हाल एट्लानटन इटालियन शीर्ष डिभिजन सिरी ‘ए’ को १३औँ स्थानमा छ । टोलीले ११ खेल खेल्दा दुई जित, सात बराबरी र दुई हारसँगै १३ अंक जोडेको छ ।
सोमबार एट्लान्टाले घरेलु मैदान जेविस रंगशालामा सासुओलोसँग ३–० को हार व्यहोरेको थियो ।
