काठमाडौं । राष्ट्रिय स्वतन्त्र पार्टी (रास्वपा)का प्रभावशाली सांसद डा. अमरेशकुमार सिंहले आफ्नै पार्टीको सरकारको प्रभाव र विश्वास जनतामा घट्दै गइरहेको बताएका छन् ।देशमा भइरहेका घटनाले नेपाली जनता एंगरमा रहेको उनको भनाइ छ । सोमबार बसेको प्रतिनिधिसभा बैठकको शून्य समयमा सांसद सिंहले बालेन सरकारप्रति जनतामा विश्वास घट्दै गइरहेको बताएका हुन् ।
‘बाराको सिमरामा भएको घटना, सप्तरीमा बालिका हत्याको घटानले मर्माहत तुल्याएको छ । यो हाम्रो देश समाज कता गइरहेको छ ? यो दुई वटा घटना मात्र होइन, हाम्रो सरकार बनेपछि चाहे कप्तनागञ्जमा धार्मिक सामाजिक सद्भावको घटना होस् या विभिन्न किसिमका आन्दोलन भइरहेको छ । चाहे मिटरब्याज होस् या लघुवित्त पीडित होस् या डाक्टरको’, सांसद सिंहले भने, ‘यसले के देखाउँछ कि हाम्रो सरकारको प्रभाव र विश्वास जनतामा घट्दै गइरहेको छ । अराजकता, अस्थिरता, हत्या, हिंसा बलात्कार र विभिन्न किसिमको आन्दोलनले नेपाली जनता एंगरमा छ ।’
समयमा बेथिति बढ्ने र विश्वास तथा भरोसा उडेपछि अपराधका घटना हुने उनको भनाइ थियो । सांसद सिंहले यसअघि संसद्मै बालेन सरकारप्रति मधेशमा आक्रोश बढेको र कुनै पनि बेला विस्फोट हुनसक्ने बताएका थिए । रास्वपा संसदीय दलको बैठकमा उनले छठपछि मधेशका जिल्लामा सांसदहरू कुटिने खतरा रहेको औंल्याएका थिए ।
