डडेल्धुरा । डडेल्धुराका प्रमुख जिल्ला अधिकारी अमरबहादुर वलीले सरकारी कार्यालयमा कर्मचारीको नियमित उपस्थिति र समयपालनलाई कडाइ गर्न छड्के निरीक्षणलाई तीव्रता दिएका छन्। जिल्ला प्रशासन कार्यालय डडेल्धुराले शुक्रबार बिहान ९ः१५ बजे जिल्लाका २५ वटा सरकारी कार्यालयमा गरेको छड्के निरीक्षणका क्रममा सात कार्यालय प्रमुखसहित ५८ कर्मचारी अनुपस्थित रहेको पाइएको छ।
प्रशासनिक अधिकृत तथा सूचना अधिकारी चन्द्रबहादुर रोकायाका अनुसार अनुपस्थित कर्मचारीलाई कार्यालयमा उपस्थित हुन नसक्नुको कारण खुलाउँदै स्पष्टीकरण पेस गर्न निर्देशन दिइएको छ। सम्बन्धित कार्यालयलाई पनि अनुपस्थित कर्मचारीको विवरण र कारण खुलाएर प्रशासनमा पठाउन भनिएको छ। डडेल्धुरामा करिब ४५ वटा सरकारी कार्यालय रहेकामा पहिलो चरणमा २५ कार्यालयमा हाजिरी निरीक्षण गरिएको हो।
नागरिकलाई प्रभावकारी र समयमै सेवा उपलब्ध गराउने उद्देश्यले प्रशासनले आगामी दिनमा पनि छड्के निरीक्षणलाई निरन्तरता दिने जनाएको छ। यसले कर्मचारीको उपस्थिति, समयपालन र सेवा प्रवाहमा जवाफदेहिता बढाउने अपेक्षा गरिएको छ। प्रमुख जिल्ला अधिकारी वलीको सक्रियतासँगै डडेल्धुरामा प्रशासनिक अनुशासन र सेवा प्रवाहलाई प्रभावकारी बनाउने प्रयास अघि बढेको देखिएको छ।
