काठमाडौं । बारामा बलात्कार र हत्या आरोपी बालकको भिडियो खिचेर सार्वजनिक गरेको आरोपमा प्रहरी हवल्दार पक्राउ परेका छन् । गोरखा घर भई जिल्ला प्रहरी कार्यालय बारामा कार्यरत प्रहरी हवल्दार कुमार विकलाई प्रहरीले पक्राउ गरेर हिरासतमा राखेको हो ।
उनले तीन वर्षीया बालिकालाई बलात्कार र हत्या गरेको आरोपमा पक्राउ परेका एक बालकको भिडियो बयान खिचेर सार्वजनिक गरेको आरोप लागेको छ । ‘अभियुक्त बनाइएका बालकको भिडियो खिचेर सार्वजनिक गरेको घटना सम्बन्धमा हामीले प्रहरी हवल्दार कुमार विकलाई हिरासतमा राखेर थप अनुसन्धान गरिरहेका छौं’, बारा प्रहरी प्रमुख, एसपी नरेन्द्र कुँवरले लोकान्तरलाई भने ।
ती बालकको बयान चलिरहेको बेलामा बयान कक्षमा खिचेको भिडियो सोमबार सामाजिक सञ्जालमा तीव्र गतिमा फैलिएको छ ।
