काठमाडौँ । कलैया उपमहानगरपालिका-१ कटि पर्सा टोलबाट हराएकी करिब दुई वर्षीया बालिका बिन्दी कुमारी मण्डललाई प्रहरीले खोजीका क्रममा सकुशल फेला पारेको छ। मुकेश कुमार मण्डलकी छोरी बिन्दी शनिबार साँझ करिब ५:३० बजे घरको अगाडिबाट सम्पर्कविहीन भएकी थिइन्। बालिका हराएको जानकारी उनका हजुरबुवा मदन मण्डलले राति करिब ८:४५ बजे अस्थायी प्रहरी पोस्ट बसपार्क, बारामा गराएका थिए।
सूचना प्राप्त भएलगत्तै प्रहरीले खोजी कार्य अघि बढाएको थियो। बालिकाको अवस्था पत्ता लगाउन रातभर विभिन्न समूह बनाएर प्रहरी परिचालन गरिएको थियो भने खोजीमा तालिमप्राप्त कुकुरसहितको प्रहरी टोलीसमेत खटाइएको थियो। प्रहरीका अनुसार आइतबार बिहान करिब ५:४५ बजे कलैया उपमहानगरपालिका–२६ सिस्वास्थित सडकबाट बालिका सकुशल फेला परेकी हुन्।
फेला परेपछि आवश्यक प्रक्रिया पूरा गरी बिहान ११ बजे बालिकालाई उनका बुबा मुकेश कुमार मण्डल र हजुरआमा सावित्री मण्डलको जिम्मा लगाइएको प्रहरीले जनाएको छ। बालिका हराएको सूचना प्राप्त भएपछि तत्काल खोजी टोली परिचालन गरी केही घण्टामै सकुशल उद्धार गरिएको घटनाले बालबालिका हराउने अवस्थामा तत्काल प्रहरीलाई जानकारी गराउनु र समन्वयमा खोजी अघि बढाउनुको महत्त्वसमेत देखाएको छ।
