काठमाडौं । सेयर बजार परिसूचक (नेप्से) बुधबार दोहोरो अंकले घटेर बन्द भएको छ । नेप्से परिसूचक १५.४३ अंकले घटेर २५४५.४० विन्दुमा आइपुगेको हो । यस दिन लगानीकर्ताले चार अर्ब १९ करोडको कारोबार गरेका छन् । कारोबार सुरु भएबाटै घट्न थालेको बजारमा अन्तिम समयसम्म सुधार नदेखिएको हो । जसले गर्दा सबैभन्दा धेरै विकास बैंकहरूको मूल्यमा गिरावट देखिन पुग्यो । यो समूहको उपसूचक २.३७ प्रतिशतले घट्दा अन्य सबै समूहको सूचक सामान्यले घटेको छ ।
यस दिन ७४ कम्पनीको मूल्य बढेको छ । १९२ कम्पनीको मूल्य घट्दा ११ वटाको स्थिर रह्यो । माथिल्लो लोहरे खोला हाइड्रोपावरको सेयरमा सकारात्मक सर्किट लागेकाे छ । यस दिन इमर्जिङ नेपाल, सिन्धु विकास बैंक, जानकी फाइनान्स र कालिन्चोक दर्शन लिमिटेडको सेयर घटेको छ । यी चारवटै कम्पनीको सेयर मूल्य १४ प्रतिशतले घटेको हो ।
