काठमाडौं। च्यासलस्थित पार्टी मुख्यालयमा आयोजित पत्रकार सम्मेलनमा नेकपा एमालेमा महासचिव शंकर पोखरेलले पूर्वराष्ट्रपति विद्या भण्डारीको पार्टी सदस्यता स्वतः निष्क्रिय भएको जानकारी दिनुभएको छ। महासचिव पोखरेलले पार्टी राजनीतिमा फर्किन उपयुक्त नहुने निष्कर्ष निकालेसँगै भण्डारीको पार्टी सदस्यता नवीकरणको विषय स्वतः निष्क्रिय भएको बताउनुभएको हो ।
मंगलबार मध्यराति एमालेको केन्द्रीय कमिटीले पूर्वराष्ट्रपति भण्डारी सक्रिय राजनीतिमा आउन नहुने भन्दै सबैको सम्मानित भएर बस्नुपर्ने निष्कर्ष निकालेको थियो । राष्ट्रपतिलाई सभामुखसँग जोडेर हेर्न नहुने भन्दै महासचिव पोखरेलले सभामुख राजनीतिक जिम्मेवारी भएकाले पूर्वराष्ट्रपतिसँग जोडेर हेर्न नमिल्ने जिकीर गर्नुभयो
पोखरेलले सत्तारुढ दल नेकपा एमालेले आगामी महाधिवेशनमा नेतृत्वको प्रतिस्पर्धाका लागि कसैलाई पनि नरोकेको दाबी गर्नुभएको छ। उहाँले दुई वर्षे कार्यकाल र ७० वर्षे उमेरहदको विषय हटाउनुले अध्यक्षको दाबेदार ओली नै हो भन्ने कुरा राजनीतिक भएको जिकिर गर्नुभयो। ७० वर्ष पुगेको व्यक्तिले पनि स्वभाविक रुपमा नेतृत्वको श्रेष्ठता हासिल गर्न सक्छ भने उसलाई किन अघि नबढाउने भन्ने आधारमा यो निर्णय भएको बताउनुभयो।
