काठमाडौं । नेपाली कांग्रेसको केन्द्रीय कार्यसमितिको बैठक फेरि स्थगित भएको छ। आइतबार दिउँसो २ बजे बस्ने भनिएको बैठक सरेको मुख्य सचिव कृष्णप्रसाद पौडेलले जानकारी दिए। उनका अनुसार बैठक सोमबारका लागि सारिएको छ।
कांग्रेसले असोज २८ देखि केन्द्रीय समिति बैठक गरे पनि महाधिवेशन कार्यतालिकामा मतभेद हुँदा अहिलेसम्म निर्णय लिन सकेको छैन। कार्यवाहक सभापति पूर्णबहादुर खड्काले महाधिवेशन तिथिमितिबारे सहमति जुट्न नसकेपछि बैठक फेरि स्थगित भएको हो।
कांग्रेसका महामन्त्रीद्वय गगन थापा र विश्वप्रकाश शर्माले पुसभित्रै नियमित महाधिवेशन नगर्ने हो भने विशेष महाधिवेशनको विकल्प नहुने अडान राख्दै आएका छन्। सभापति शेरबहादुर देउवानिकट केही पदाधिकारी र केही पूर्व पदाधिकारीहरूले चुनावपछि वैशाखमा मात्रै महाधिवेशन गर्नुपर्ने अडान राखेका छन्।
सभापति शेरबहादुर देउवानिकट केही पदाधिकारी र केही पूर्व पदाधिकारीहरूले चुनावपछि वैशाखमा मात्रै महाधिवेशन गर्नुपर्ने अडान राखेका छन्। कांग्रेसमा फागुन २१ को चुनावअघि नियमित महाधिवेशन गर्ने कि विशेष महाधिवेशन भन्ने विवाद छ। कतिपय नेताले विशेष महाधिवेशनको विरोध गर्दै वैशाखमा नियमित महाधिवेशन गर्नुपर्ने अडान राखेका छन्।
यसैबीच ५४ प्रतिशत महाधिवेशन प्रतिनिधिहरूले विशेष महाधिवेशन माग गरेका छन्। नेता गुरूराज घिमिरेले कांग्रेस केन्द्रीय समिति बैठक डेढ महिनासम्म चलेर कीर्तिमान कायम राखे पनि महाधिवेशनबाट निर्णय गर्न नसकेको भन्दै आलोचना गरेका थिए। विशेष महाधिवेशन पक्षधरहरूले विशेष महाधिवेशनका लागि मिति र स्थान तोक्न पनि माग गरिरहेका छन्।
सभापति देउवानिकट नेताहरूले भने नियमित महाधिवेशन नै गर्नुपर्ने भन्दै विभिन्न बैठक तथा भेला गर्दै आएका छन्।
