एजेन्सी । गाजामा पछिल्लो ४८ घण्टामा एक सय बढी प्यालेस्टाइनी मारिएका छन् । इजरायलले घेरा हालेको क्षेत्रमा बमबारी तीब्र पारेसँगै दुई दिनमा कम्तिमा पनि १२० जना प्यालेस्टाइनी मारिएका हुन् ।
गाजाको स्वास्थ्य अधिकारीहरुका अनुसार इजरायली हवाई आक्रमणले मध्य गाजामा रहेको नुसीरत शरणार्थी शिविरनजिक रहेको अल फारुक मस्जिदमा ठुलो क्षति पुगेको छ । सोही क्षेत्रमा आंशिक रुपमा सञ्चालित अस्पतालमा भएको आक्रमणमा कयौं स्वास्थ्य कर्मचारी घाइते भएका छन् । इजरायली सेनाले उत्तरी गाजामा स्थल आक्रमण तथा बमबारीलाई तीब्र पारेको हो ।
यता, आक्रमणका कारण शरणार्थीहरुले आश्रय लिएर बसेको शिविरमा समेत आक्रमण भएपछि उनीहरुको बिचल्ली भएको छ । खाद्यान्न र पानी अभावका कारण भोकमरीको शिकार बनेका हजारौं गाजाका सर्वसाधारण नागरिकको अवस्था नाजुक बन्दा पनि युद्ध रोकिने कुनै संकेत देखिएको छैन ।
