काठमाडौं । जिल्ला अदालत काठमाडौंले पत्रकार किशोर श्रेष्ठलाई चार दिन थुनामा राख्न प्रहरीलाई अनुमति दिएको छ । जनआस्था साप्ताहिकका सम्पादक किशोर श्रेष्ठलाई थप चार दिन थुनामा राखेर अनुसन्धान गर्न काठमाडौं जिल्ला अदालतले अनुमति दिएको हो । प्रहरीले श्रेष्ठलाई थुनामा राख्न म्याद थपका लागि सोमबार (भदौ १) अदालतमा उपस्थित गराएको थियो ।
यसअघि श्रेष्ठलाई तीन दिन थुनामा राखेर अनुसन्धान गर्न अदालतले अनुमति दिएको थियो । थुना म्याद सकिएपछि अनुसन्धान नसकिएको भन्दै पुनः थुना म्यादको माग गरिएको थियो । गत साउन २७ गते पक्राउ गरिएका श्रेष्ठको थुनामुक्तीको माग राखेर उनकी पत्नी सरस्वती श्रेष्ठले बिहीबार सर्वोच्चमा रिट दर्ता गरेकी थिइन् ।
यसअघि साउन २९ गते सर्वोच्चले श्रेष्ठ र उनका बरामद सामानसहित भदौ १ गते सोमबार सर्वोच्चमा उपस्थित गराउन आदेश दिएको थियो । श्रेष्ठको बन्दीप्रत्यक्षीकरण रिटमा सर्वोच्च अदालतका न्यायाधीशद्वय डा. नहकुल सुवेदी र बालकृष्ण ढकालको संयुक्त इजलासमा सुनुवाइको पेशी तय भएको छ ।
श्रेष्ठ वैयक्तिक गोपनीयता हननको कसुर आरोपसहित पक्राउ परेका थिए । उनलाई महाराजगञ्ज प्रहरीको हिरासतमा राखिएको थियो ।
