काठमाडौं । कोसी प्रदेशको राजधानी विराटनगरस्थित जिल्ला कारागार मोरङभित्र सुरक्षाकर्मीले सर्च अभियान र खानतलासी सुरु गरेका छन् । त्यहाँ लागुऔषध लगायतका अवैध वस्तु लुकाएर राखिएको गोप्य सूचनाका आधारमा सोमबार (भदौ १) बिहानैदेखि खानतलासी गरिएको प्रहरीले जनाएको छ । कारागार प्रशासनले ठूलो संख्यामा नेपाल प्रहरी र सशस्त्र प्रहरी बलका सुरक्षाकर्मी परिचालन गरेको छ । विभिन्न ब्लक तथा कक्षहरूमा सुरक्षाकर्मी पुगेर खानतलासी गरिरहेका छन् ।
कारागारभित्र गाँजासहित लागुपदार्थको समेत कारोबार र प्रयोग हुन थालेपछि सुरक्षा संवेदनशीलतालाई ध्यानमा राखी सर्च अभियान चलाइएको कारागार प्रशासनले जनाएको छ । खानतलासी गर्न सुरक्षाकर्मीको टोली कारागारभित्र प्रवेश गरेलगत्तै कैदीबन्दीहरूले नाराबाजी गरेका छन् । कैदीहरू कारागारको छतमा पुगेर नाराबाजी गरिरहेका छन् ।
कारागार परिसर र बाहिर सुरक्षाकर्मीको बाक्लो उपस्थिति रहेको छ । सुरक्षा व्यवस्था चुस्त बनाउन र अवैध वस्तुको ओसारपसार रोक्न खानतलासी गरिएको जनाइएको छ ।
