काठमाडौं। बागमती प्रदेशसभाको हिउँदे अधिवेशन चैत २४ गतेका लागि आह्वान गरिएको छ। प्रदेश सरकारको सिफारिसमा प्रदेश प्रमुख दीपक प्रसाद देवकोटाले सोमबार प्रदेशसभाको अधिवेशन आह्वान गर्नुभएको हो।
जसअनुसार प्रदेश सभा बैठक मंगलबार दिउँसो ४ बजे बस्नेछ । यसअघि प्रदेश सरकारको आइतबार बसेको मन्त्रिपरिषद् बैठकले अधिवेशन आह्वानका लागि सिफारिस गरेको थियो ।
संसदको वर्षे अधिवेशन अन्त्य भएको ५ महिना पछि सरकारले हिउँदे अधिवेशन आह्वान भएको हो । गत मंसिर ३ मा प्रदेश सरकारको सिफारिसमा प्रदेश प्रमुख देवकोटाले संसदको चालु वर्षे अधिवेशन अन्त्य गरेका थिए । जेनजी आन्दोलन र विपद्को कारण सरकारले प्रदेशसभा बैठक बोलाउन नसक्दा विगत ८ महिना प्रदेशसभा बैठक बस्न सकेको थिएन । गत साउन २७ मा प्रदेशसभाको अन्तिम बैठक बसेको थियो ।
त्यस लगत्तै भएको जेनजी आन्दोलनका क्रममा प्रदेशसभा सचिवालय, सभा हल सहितका प्रदेशका विभिन्न संरचना जलेपछि बैठक सञ्चालन अन्योल बनेको थियो । जेनजी आन्दोलन कै बिचमा प्रदेशसभाका तत्कालीन सभामुख भुवनकुमार पाठकले पदबाट राजीनामा घोषणा गरेका थिए ।
उनले असोज १ गते प्रदेशसभामा लिखित राजीनामा पेस गरेका थिए । बैठक सञ्चालन नगरी मंसिर ३ मा हाउस अन्त्य गर्ने सरकारको निर्णय पछि प्रदेशसभाकी उपसभामुख अप्सरा चापागाईंले सार्वजनिक सूचना जारी गर्दै सभामुखको राजीनामा बारे सांसदहरूलाई जानकारी गराएकी थिइन् ।
