काठमाडौं । इराकका अधिकारीहरूका अनुसार बगदादमा रहेको अमेरिकी दूतावासको हेलिप्याडमा एउटा मिसाइल खसेको छ । समाचार एजेन्सी एसोसिएटेड प्रेसका अनुसार मिसाइल दूतावास परिसरभित्र बनेको हेलिप्याडमा खसेको छ ।
इराकको राजधानी बगदादस्थित अमेरिकी दूतावास परिसरनजिकै रहेको सी–र्याम एयर डिफेन्स सिस्टमसँग सम्बन्धित एउटा युनिटलाई आज मिसाइलले निशाना बनाएको हो । अहिलेसम्म यस हमलाको जिम्मेवारी कुनै पनि समूहले लिएको छैन ।
यद्यपि, इरान समर्थित सशस्त्र समूह इस्लामिक रेसिस्टेन्सले यसअघि पनि धेरैपटक इराकमा रहेका अमेरिकी ठेगानाहरू, सैन्य अखडा र हितहरूलाई निशाना बनाउँदै आएका छन् ।
यो संगठन धेरै इरान समर्थित इराकी मिलिसिया समूहहरूको गठबन्धन हो । यी समूहहरूले इरानका पूर्वसर्वोच्च नेता अली खामेनीईको मृत्युको बदला लिने कसम समेत खाएका छन् ।
रिपोर्टका अनुसार शुक्रबार ‘इस्लामिक रेसिस्टेन्स इन इराक’ले एउटा बयान जारी गर्दै जसले अमेरिकी सैन्य वा गुप्तचर कर्मचारीहरूलाई समात्न वा निशाना बनाउन जानकारी दिनेलाई एक लाख डलर पुरस्कार दिने भनेको थियो ।
इरानी सेनाले भन्यो– यूएईमा रहेका अमेरिकी अखडाहरूलाई निशाना बनाउनेछौँ यसैबीच, इरानको इस्लामिक रिभोलुसनरी गार्ड कर्प्सले संयुक्त अरब इमिरेट्समा रहेका अमेरिकी अखडाहरूलाई अब निशाना बनाइने बताएको छ ।
यो भनाइ इरानको खार्ग टापुमा अमेरिकाले गरेको हमलापछि आएको हो । तस्निम न्युज एजेन्सीका अनुसार, रिभोलुसनरी गार्डले इरानसँग आफ्नो राष्ट्रिय सार्वभौमसत्ता र क्षेत्रको रक्षा गर्ने अधिकार रहेको बताएको छ । त्यसैले, उसले ती स्थानहरूलाई निशाना बनाउन सक्छ जहाँबाट अमेरिकी मिसाइल हमलाहरू गरिएका छन् ।
यूएईका केही सहरहरूमा रहेका बन्दरगाह, डक र त्यहाँ तैनाथ अमेरिकी सैनिकका ठेगानाहरू सम्भावित लक्ष्य हुन सक्ने विज्ञप्तिमा उल्लेख छ ।
रिभोलुसनरी गार्डले कुनै पनि सम्भावित हमलामा उनीहरूलाई क्षति नपुगोस् भनेर यूएईका बासिन्दाहरूलाई बन्दरगाह, डक र अमेरिकी सैन्य क्षेत्र नजिकका इलाकाहरू खाली गर्न अपिल गरेको छ ।
