काठमाडौं। सभामुख देवराज घिमिरेले सरकारले संसदमा पेस गरेको अध्यादेश लगायतका विषयमा छलफल थाल्नुभएको छ । सभामुखले सिंहदरबारस्थित कार्यकक्षमा प्रमुख दलका मुख्य सचेतक तथा प्रमुख सचेतकसँग छलफल थाल्नुभएको हो।
सभामुखसँगको छलफलमा काँग्रेसका प्रमुख सचेतक श्याम घिमिरे, नेकपा एमालेका प्रमुख सचेतक महेश बर्तौला, नेकपा माओवादी केन्द्रका प्रमुख सचेतक हितराज पाण्डे र राष्ट्रिय स्वतन्त्र पार्टीका प्रमुख सचेतक सन्तोष परियार सहभागी हुनुहुन्छ ।
माघ १८ गते बसेको संसद्को हिउँदे अधिवेशनमा सरकारले विभिन्न ६ वटा अध्यादेश पेस गरेको थियो । अध्यादेशको विपक्षी दलहरूले चर्को विरोध गरेका छन् । संसद्लाई छलेर सरकारले गलत तरिकाबाट अध्यादेश ल्याएको विपक्षी दलहरूको आरोप छ ।
