काठमाडौं। सत्तारुढ दल नेपाली कांग्रेसले भिजिट भिसा प्रकरणलाई लिएर रास्वपा र राप्रपाको संसद बहिष्कारको प्रतिवादमा उत्रने चेतावनी दिएको छ ।
सोमबारको प्रतिनिधिसभाको बैठकमा बोल्दै नेपाली कांग्रेसका प्रमुख सचेतक श्याम घिमिरेले लामो समयसम्म संसद बहिष्कार गरिरहेमा अन्य सांसदहरू संसदको दुरुपयोगको प्रतिवादमा उत्रनुपर्ने हुन सक्ने बताउनुभयो।
‘आज ७० दिन हुन लाग्यो । यससँग सरकार, संसद र आम जनताको ध्यानाकर्षण भएको छ । कति दिनसम्म चल्ने हो ? संसदमा उभिएर सधैँ गालीगलौज गर्ने ? भिजिट भिसा भनेको मानव तस्करी हो ? भिजिट भिसामा बाहिर नजाने को माननीय हुनुहुन्छ यहाँ ?,’ उहाँले भन्नुभयो, ‘गोयबल्स शैलीमा झुटो प्रचार गरेर आमजनतालाई भ्रमित पार्ने र संसदलाई दुरुपयोग गर्ने प्रवृत्ति बन्द हुनुपर्छ । यसमा कांग्रेसको गम्भीर आपत्ति छ । निरन्तर अभ्यासको रूपमा जारी छ । भोलि सम्पूर्ण सांसदहरूले प्रतिवादमा उत्रिनुपर्ने हुन सक्छ । यसतर्फ गम्भीर रूपमा विचार गरियोस् ।’
