काठमाडौं। महिन्द्र राययादव नेतृत्वको नेपाल समाजवादी पार्टी(नेसपा) र नेकपा (माओवादी केन्द्र) बिच महाधिवेशनको बेला एकता गर्ने सहमति भएको छ । पार्टीबाट आपसी समझदारीमै सहअध्यक्ष गंगानारायण समूह माओवादीमा समाहित भएपछि अध्यक्ष यादवले असार ७ गते पार्टी पुनर्गठन गरेका थिए ।
केन्द्रीय समितिको निर्णयसहित केही दिनअघि यादवले प्रचण्डसँग छलफल गरी पार्टी एकतामा सहमति जुटाएको हो । छलफलको क्रममा यादवले एकताका लागि आफू सकारात्मक रहेको स्पष्ट पार्दै उनले पार्टीको नाम, झन्डा, ब्यानर लगायत विषय चाँडै टुंग्याउन आग्रह गरेका थिए । प्रचण्डसँगको कुराकानीमा माओवादीको महाधिवेशनसँगै एकताको विषय टुङ्ग्याउने समझदारी भएको यादवले जानकारी दिए ।
अध्यक्ष यादवले पार्टीको नाम जे राखे पनि महाधिवेशनको निर्णय आफूहरूलाई मान्य हुने बताए । जवाफमा प्रचण्डले पार्टीको जागरण अभियान सम्पन्न भए लगत्तै केन्द्रीय समिति बैठक बस्ने र त्यसले महाधिवेशनको मिति तय गर्ने बताएको उनले जानकारी दिए । सहमति अनुसार नै पार्टीले सङ्गठन विस्तार गर्ने तर राष्ट्रिय भेला वा महाधिवेशन नगर्ने यादवले स्पष्ट पारे ।
