काठमाडौं। धनगढी उपमहानगरपालिका–४ स्थित नास्ट कलेज नजिकै आइतबार राति विद्युत् सर्ट भई भीषण आगलागी हुँदा आठवटा सटरमा क्षति पुगेको छ। आगलागीले पसलहरूमा ठुलो क्षति पुर्याएको जिल्ला प्रहरी कार्यालय कैलालीले जनाएको छ।
प्रहरीका अनुसार हेलेन ट्रेड एण्ड सप्लायर्स अन्तर्गत विश्वप्रकाश कँडेलले सञ्चालन गरेका चार वटा सटर, परिवर्तन इम्पेक्स कपडा होलसेल पसलका तीन सटर र सेन्टर प्वाइन्ट रेस्टुरेन्ट पूर्ण रूपमा क्षतिग्रस्त भएका छन्।
आगलागी आइतबार राति करिब १०ः४५ बजे सुरु भई राति १२ बजे नियन्त्रणमा ल्याइएको थियो। दमकल परिचालनमा धनगढी उपमहानगरपालिकाका दुई र गोदावरी नगरपालिकाको एक दमकल प्रयोग गरिएको थियो। प्रहरी र स्थानीय बासिन्दाहरूको सक्रिय सहयोगमा आगो नियन्त्रणमा ल्याइएको हो।
आगलागीका कारण सटरभित्र रहेका सबै सामान जलेर नष्ट भएका छन्। घटनाको थप विवरण र क्षतिको मूल्याङ्कन भइरहेको प्रहरीले जनाएको छ।
