काठमाडौं । नेपालको आयातनिर्यात अनुपात १४.०३ प्रतिशतले ऋणात्मक देखिएको छ। चालू आर्थिक वर्षको पहिलो सात महिनामा आयात १३.६५ प्रतिशत, निर्यात ३२.१९ प्रतिशतले बढेको छ। साउनदेखि पुससम्म व्यापारघाटा समेत १०.९१ प्रतिशतले बढेको छ।
त्यसैगरी वैदेशिक व्यापारको आकार समेत १५.७६ प्रतिशतले बढेको भन्सार विभागले जनाएको छ। विभागका अनुसार पुससम्म नेपालले ११ खर्ब २३ अर्ब ४८ करोड ६२ लाख १३ हजार रुपैयाँको आयात गरेको छ। गत वर्षको सोही अवधिमा नेपालले ९ खर्ब ८८ अर्ब ५८ करोड ७७ लाखको आयात गरेको थियो।
यो अवधिमा १ खर्ब ६८ अर्ब १४ करोड ५८ लाख २४ हजार रुपैयाँको निर्यात भएको छ। गत वर्षको पहिलो ७ महिनामा नेपालले १ खर्ब २७ अर्ब २० करोड ४८ लाख २९ हजारको निर्यात गरेको थियो। आयात बढ्दा व्यापारघाटा समेत ९ खर्ब ५५ अर्ब ३४ करोड ३ लाख ८९ हजार पुगेको छ। गत वर्ष सोही अवधिमा ८ खर्ब ६१ अर्ब ३८ करोड २८ लाख ७१ हजार रहेको थियो।
गत वर्ष ७ महिनामा नेपालको वैदेशिक व्यापारको आकार ११ खर्ब १५ अर्ब ७९ करोड २५ लाख २९ हजार रहेकामा यस वर्षको सोही अवधिमा १२ खर्ब ९१ अर्ब ६३ करोड २० लाख ३६ हजार पुगेको छ। पहिलो ७ महिनामा कुल व्यापारमा निर्यातको हिस्सा १३.०२ प्रतिशत छ। गत वर्ष यस्तो हिस्सा ११.४० प्रतिशत थियो। त्यसैगरी आयातको हिस्सा ८६.९८ प्रतिशत छ। गत वर्ष ८८.६० प्रतिशत थियो। तुलनात्मक रुपमा कुल व्यापारमा आयातको हिस्सा गत वर्षको ७ महिनाको तुलनामा यस वर्ष ७ महिनामा १.८३ प्रतिशतले ऋणात्मक छ।
