काठमाडौं । यमनका हुथी विद्रोहीले साउदी अरेबियाको राजधानी रियादस्थित किङ खालिद अन्तर्राष्ट्रिय विमानस्थलमा बिहीबार ब्यालिस्टिक क्षेप्यास्त्र प्रहार गरेको दाबी गरेका छन् । हुथी विद्रोहीका अनुसार, उक्त आक्रमणमा तीनजनाको मृत्यु भएको छ भने कैयौँ घाइते भएका छन् । विमानस्थललाई निशाना बनाएर हुथीले गरेको यो साताकै तेस्रो दाबी हो ।
हुथी सैन्य प्रवक्ता याह्या सारीले सामाजिक सञ्जाल एक्समार्फत क्षेप्यास्त्र प्रहारबाट विमानस्थलको सञ्चालन अवरुद्ध भएको दाबी गरेका छन् । साथै, उनले अन्तर्राष्ट्रिय एयरलाइन्सहरूलाई साउदीको आकाशमार्ग प्रयोग गरेर उडान नगर्न चेतावनी समेत दिएका छन् ।
अर्कोतर्फ, साउदी नेतृत्वको गठबन्धन सेनाका प्रवक्ता टर्की अल–मालिकीले सादा, मारिब, अल जौफ र अल हुदैदा प्रान्तमा रहेका ८२ वटा हुथी सैन्य अखडा ध्वस्त पारिएको बताएका छन् । ती स्थानहरूमा क्षेप्यास्त्र प्रक्षेपण केन्द्र, कमान्ड सेन्टर तथा क्षेप्यास्त्र र हतियार भण्डारहरू रहेको उनले उल्लेख गरे । यद्यपि, दुवै पक्षका यी दाबीहरूको स्वतन्त्र पुष्टि हुन भने बाँकी छ ।
गत जुलाईदेखि यमनमा पुनः चर्किएको द्वन्द्वको असर छिमेकी मुलुकहरूसम्म फैलिन थालेको छ । यो आक्रमण हुनुभन्दा अघिल्लो दिन साउदी समर्थित तथा अन्तर्राष्ट्रिय मान्यताप्राप्त यमनी सरकारले हुथी विद्रोहीविरुद्ध ठूलो सैन्य कारबाहीको घोषणा गरेको थियो ।
