काठमाडौं । नेपाली क्रिकेट टोलीले न्युजिल्यान्ड ‘ए’सँग एकदिवसीय अभ्यास खेल खेल्ने भएको छ । आउँदो सेप्टेम्बरमा एकदिवसीय अभ्यास खेल खेल्ने तय भएको न्युजिल्यान्ड क्रिकेट बोर्डले बिहीबार सामाजिक सञ्जालमार्फत जानकारी दिएको हो ।
तालिकाअनुसार, न्युजिल्यान्ड ‘ए’ले सेप्टेम्बर २ मा दक्षिण अस्ट्रेलिया (क्लब)सँग खेल्नेछ । सेप्टेम्बर ४ मा तास्मानिया र ६ मा नेपालसँग खेल्नेछ । यी तीनै खेल अस्ट्रेलियाको डार्विनस्थित मरारा क्रिकेट ग्राउन्ड–२ मा खेलिनेछ ।
यो अभ्यास शृंखलाअघि न्युजिल्यान्ड ‘ए’ टोलीले अगस्ट २० देखि ३० सम्म हुने एनटी टप एन्ड टी–२० सिरिजमा प्रतिस्पर्धा गर्नेछ । नेपालले पनि उक्त प्रतियोगितामा सहभागिता जनाउनेछ । न्युजिल्यान्ड ‘ए’ टोलीमा क्रिस्टियन क्लार्क, म्याट फिसर, डिन फक्सक्रफ्ट, मिच हे, जेडेन लेनोक्स, बेन लिस्टरजस्ता सिनियर टोलीबाट खेलिसकेका खेलाडी छन् ।
