काठमाडौं। नेकपा एमालेका उपाध्यक्ष सुरेन्द्र पाण्डेले आगामी विधान महाधिवेशनमा आफूहरूका फरक मत पार्टीका आधिकारिक दस्ताबेजमा नसमेटिए फरक मतकै रूपमा अघि बढाउने तयारी भएको बताउनुभएको छ।
सोमबार काठमाडौंमा भएको ‘एमालेमा आन्तरिक लोकतन्त्र’ विषयक अन्तरसंवाद कार्यक्रममा बोल्दै उपाध्यक्ष पाण्डेले आफूहरुले विगतको बैठकमा पूर्व राष्ट्रपति विद्या भण्डारीको सदस्यताबारे राखेको फरक मत पार्टीका नेताहरूले पेस गर्ने दस्ताबेज हेरेपछि थाहा हुने बताउनुभयो।
‘पछिल्लो बैठकमा म सहित नेताहरूले फरक मत राखेका हौँ । त्यो फरक मत नोट कमिटीलाई समेट्न आग्रह गर्यौँ’, उहाँले भन्नुभयो, ‘तर अपानिमा आएन र हामीले पुनः पार्टीलाई फरक मत समेट्न आग्रह गरेका छौँ ।’
उहाँले अब हुने विधान महाधिवेशनमा पार्टीमा रहेका विमतिहरू दस्ताबेजमा समेटिए विमति कायम नहुने तर नसमेटिए स्वभाविका रूपमा फरक मत रहने बताउनुभयो। ‘त्यो विमति समावेश गरियो भने विमति रहने नै भएन । यदि समेटिएन भने कायमै रहन्छ र हामीले उठाउने छौँ’,पाण्डेको भनाइ छ ।
