काठमाडौं। पार्टीको बिहीबार बसेको राप्रपा केन्द्रीय कार्यसम्पादन समितिको बैठकले भदौ दोस्रो साता केन्द्रीय समिति बैठक बोलाउने निर्णय गरेको छ। बैठक काठमाडौंमा बस्ने तय भएको प्रवक्ता मोहन श्रेष्ठले जारी गरेको विज्ञप्तिमा उल्लेख छ।
यस्तै पार्टीको स्थानीय, जिल्ला र प्रदेश तहको अधिवेशनहरू असोज मसान्तसम्म सम्पन्न गर्ने निर्णयका सन्दर्भमा आजको बैठकमा प्रगति समीक्षा गरिएको उनले बताए । अपेक्षाकृत रूपमा अधिवेशनहरू हुन नसक्दा विधानअनुसार यसैवर्ष गर्नुपर्ने महाधिवेशन प्रभावित बन्नसक्ने अवस्थालाई दृष्टिगत गर्दै असोज मसान्तसम्म सबै जिल्ला, स्थानीय र प्रदेश तहको अधिवेशन सम्पन्न गर्ने वातावरण बनाउन केन्द्रीय निर्वाचन समितिलाई अनुरोध गरिएको उनले बताए ।
साथै, आगामी आन्दोलन, पार्टी प्रवेश अभियान, सक्रिय सदस्यता वितरण अभियान र जिल्ला अधिवेशनलाई प्रभावकारी ढंगले अघि बढाउन सबै जिल्लामा केन्द्रीय पर्यवेक्षक खटाउने निर्णय गरिएको छ ।
