काठमाडौं। चक्रे मिलन भनिने मिलन गुरूङसहित १९ जनाविरूद्ध अभद्र व्यवहारको कसुरमा जिल्ला अदालत काठमाडौंमा मंगलबार मुद्दा दायर भएको छ। उक्त मुद्दामाथि बुधबार सुनुवाइ हुनेछ। उनीहरूको मुद्दा न्यायाधीश खिमानन्द भूसालको इजलासमा बयान तथा सुनुवाइ भइरहेको छ।
प्रहरीले केही दिनअघि मुद्दाको अनुसन्धान सकेर चक्रेसहित १९ जनामाथि अनुसन्धानका लागि सरकारी वकिलको कार्यालयमा प्रतिवेदन बुझाएको थियो। प्रहरीले चक्रे मिलनसहित गणेशबहादुर बोगटी, निराजन पौडेल, रोशन सुवेदी, रोजेश खड्का, सन्दीप केसी, राहुल खड्का, यामु पौडेल, सौरभ सुनार, डिल्लीराज कँडेल, ऋतिक लामा, चन्द्रदेव कार्की, जितबहादुर लामा, प्रकाश गोले, अमिर आलेमगर, उत्तम मर्जन, प्रनिस कट्टेल, राजु परियार र सफल भन्ने सुजल शाहीलाई मुद्दा चलाउन राय दिएको थियो।
प्रहरीले उनीहरूलाई साउन १६ गते मध्यराति महाराजगन्जस्थि साम्बाला होटलबाट नियन्त्रणमा लिएको थियो। सुरूमा ४७ जनालाई नियन्त्रणमा लिएको थियो। प्रहरीले पछि १९ जनालाई मात्रै म्याद थपेर बाँकीलाई छाडेको थियो। उनीहरूले सवारीसाधनले सडकमा बाटो कब्जा गरेको, होहल्ला गरी हैरानी दिएको, अश्लिल अपशब्दहरू बोलेको, जन्मदिन मनाउने नाममा आतंकित बनाएको आरोप छ।
सरकारी वकिलको कार्यालय काठमाडौंमा चक्रे मिलनले बयान दिँदा आफू अहिले नेकपा एमालेको गोरखास्तरीय पार्टीको सदस्य भएर पार्टीगत रूपमा विभिन्न वडामा हुने कार्यक्रम र सामाजिक सेवा लगायतमा सहभागी हुँदै आएको पनि उल्लेख गरेका छन्। आफ्नो जन्मदिन साउन महिनामा पर्ने भएकाले पहिलो सातादेखि नै जन्मदिन मनाइदिन आउनेहरू समर्थकहरू रहेको पनि उनले बयानमा खुलाएका छन्।
त्यस्तै चक्रे मिलनले साम्बाला होटलमा पनि जन्मदिन मनाउनका लागि ग्राउन्ड फ्लोर र रूफटप बुकिङ गरेका थिए।मध्यराति केक काटेर सबै जना रमाइरहेको बेलामा प्रहरी आएको उनले बताए।त्यही बेला आफ्ना भाइहरूले प्रहरीसँग भनाभन गरेको उनले बयानमा खुलाएका छन्। उनले ठूलो संख्यामा भेला गरी जन्म दिन मनाउने कार्यक्रम सञ्चालन गर्नु गल्ती भएको पनि बताएका छन्।
