काठमाडौं । नेपाली कम्युनिस्ट पार्टी (नेकपा) ले कात्तिक ७ गतेदेखि सञ्चालन हुने दुईमहिने राष्ट्रिय जागरण अभियानको सम्पूर्ण तयारी पूरा भएको जनाएको छ । पार्टीका प्रवक्ता प्रकाश ज्वालाले अभियान सञ्चालनका लागि आवश्यक तयारी पूरा भएको जानकारी दिएका हुन् ।
उनका अनुसार, अभियानको उद्घाटन तथा पत्रकार सम्मेलन कात्तिक ७ गते दिउँसो साढे २ बजे पार्टीको केन्द्रीय कार्यालय पेरिसडाँडामा आयोजना हुनेछ । पत्रकार सम्मेलनमार्फत अभियानको औपचारिक उद्घाटन गर्ने तयारी गरिएको प्रवक्ता ज्वालाले बताए ।
पार्टीका संयोजक पुष्पकमल दाहाल 'प्रचण्ड' र सहसंयोजक माधवकुमार नेपालले विशेष सम्बोधन गर्दै अभियानको उद्घाटन गर्ने कार्यक्रम रहेको उनले जानकारी दिए । नेकपाको यसअघि असोज २३ गते बसेको केन्द्रीय कार्यसंयोजन समितिको बैठकले दुईमहिने राष्ट्रिय जागरण अभियान गर्ने निर्णय गरेको थियो ।
