काठमाडौं । सरकारका प्रवक्ता तथा शिक्षामन्त्री सस्मित पोखरेलले संसद् अधिवेश स्थगितको निर्णय ठूलो नभएको बताएका छन् । सरकारका पछिल्ला निर्णय सार्वजनिक गर्दै संसद्लाई पर्याप्त बिजनेस दिनका लागि तयारी गर्न स्थगित गरेको बताए ।
“यो ठूलो विषयचाहिँ होइन । हामीले बजेट अधिवेशनमा धेरै विधेयक ल्याउँदै छौँ । कतिपय विधेयकमा अझै काम गरेर पर्याप्त बिजनेस भइसकेपछि अधिवेशन आह्वान गर्दा संसद्लाई पनि बिजनेस हुने भनेर स्थगित गरिएको हो । सामान्य कुरा हो,” पोखरेलले भने ।
उनले संसद् अधिवेशन रोकेर अध्यादेश ल्याउने विषयमा छलफल नगरिएको दाबी गरे । “अहिले हाम्रो योजना भनेको विधेयकको रूपमा नै कानुन ल्याउने हो । त्यस्तो अहिलेसम्म कुनै छलफल भएको छैन,” पोखरेलले भने । संसद्को अधिवेशन बुधबार आह्वान गरेर बिहीबार स्थगित गरिएको थियो ।
