काठमाडौं । नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीको पित्तथैलीको शल्यक्रिया कहिले गर्ने भन्ने विषयमा चिकित्सकहरू छलफलमा जुटेका छन् । हाल ओली काठमाडौंको महाराजगन्जस्थित त्रिवि शिक्षण अस्पतालमा उपचाररत छन् । ओलीको शल्यक्रिया सोमबार अथवा मंगलबार गरिने अस्पतालका सहायक प्रवक्ता कालीबहादुर रोस्याराले जानकारी दिए । उनका अनुसार ओलीको पिसाब संक्रमण निको भएमा सोमबार नै शल्यक्रिया गरिनेछ । “उहाँ (केपी ओली)को स्वास्थ्य अवस्था अहिले स्थिर छ, हामी सोमबार वा मंगलबारमा शल्यक्रिया गर्न सक्छौँ कि भनेर छलफलमा छौँ,” सहायक प्रवक्ता रोस्याराले भने ।
ओलीको पित्तथैलीमा समस्या देखिएको छ । प्रहरीले नियन्त्रणमा लिएपछि स्वास्थ्यमा समस्या देखिँदा उनलाई उक्त अस्पतालमा भर्ना गरिएको थियो । प्रहरीले बिहीबार बिहान उनलाई परिवारको जिम्मा लगाएर छाडिसकेको छ ।
