काठमाडौं। २०८२ सालको माध्यमिक शिक्षा परीक्षा (एसईई) पूरक परीक्षाको नतिजा मंगलबार बिहान सार्वजनिक भएको छ। राष्ट्रिय परीक्षा बोर्डले ग्रेड्बृद्धिको लागि लिएको पूरक परीक्षाको नतिजा सार्वजनिक गरेको हो।
गत असार १ देखि ९ गते सम्म भएको पूरक परीक्षामा सहभागी परीक्षार्थीमध्ये ६४.६८ प्रतिशत उतिर्ण भएको कक्षा १० का परीक्षा नियन्त्रक टुकराज अधिकारीले बताएका छन्। उक्त परीक्षामा १ लाख २९ हजार १ सय १४ जना सामेल थिए। जसमा, ८३ हजार ५ सय २३ जना वर्गीकृत हुन सफल भएका उनले बताए।
पूरकको नतिजासँगै एसईई उतीर्ण गर्ने विद्यार्थी ८५.३७ प्रतिशत पुगेका छन्। परीक्षामा नियमिततर्फ ४ लाख ३० हजार ६ सय ६७ परीक्षार्थी रहेका थिए। मूल परीक्षामा ननग्रेडेड रहेका र ग्रेड वृद्धिका लागि योग्य रहेका १७ हजार ३ सय ९३ विद्यार्थी भने पूरक परीक्षामा सहभागी नै भएनन्। बोर्डका अनुसार परीक्षार्थीले नतिजा राष्ट्रिय परीक्षा बोर्डको वेबसाइट,परीक्षा नियन्त्रण कार्यालय(कक्षा १०)को वेबसाइट, विभिन्न सूचना प्रदायक र टेलिफोन सेवा प्रदायकका वेबसाइट, आईभीआर, एसएमएस तथा यूएसएसडी सेवामार्फत हेर्न सक्नेछन्। साथै, परीक्षा नियन्त्रण कार्यालयले वेबसाइटबाट सिम्बोल नम्बर र जन्ममिति प्रयोग गरी ग्रेडसिट डाउनलोड गर्न सक्ने व्यवस्था गरिएको जनाएको छ ।
प्रकाशित नतिजामा चित्त नबुझेका परीक्षार्थीले उत्तरपुस्तिका हेर्न तथा पुनः परीक्षण गराउन समेत सक्ने व्यवस्था मिलाइएको छ । सोको लागि असार २५ गतेदेखि असार ३१ गतेसम्म निवेदन दिनुपर्ने परीक्षा नियन्त्रक टुकराज अधिकारीले जनाएका छन् । निवेदन अनलाइनबाट दिने ब्यवस्था गरिएको छ । बिस्तृत जानकारी परीक्षा नियन्त्रण कार्यालयको वेबसाईट www.see.gov.np मा हेर्न सकिनेछ ।
