काठमाडौं । नेपाली कांग्रेस संसदीय दलको नेता सकभर आज (वैशाख १३) टुंगो लगाउने तयारी छ । शुक्रबार (वैशाख ११) पार्टी केन्द्रीय कार्यालय सानेपामा बसेको कार्यसम्पादन समितिको बैठकबाट दलको नेता छान्न कार्यदल बनाइएको थियो । उपसभापति विश्वप्रकाश शर्माको संयोजकत्वमा गठित कार्यदलमा अर्का उपसभापति पुष्पा भुसाल तथा महामन्त्रीद्वय प्रदीप पौडेल र गुरुराज घिमिरे सदस्य छन् । कार्यदललाई ७२ घण्टाको समयावधि दिइएको थियो ।
कांग्रेस महामन्त्री पौडेलले भने, “कार्यसम्पादन समितिको शुक्रबार बसेको बैठकले हाम्रो कार्यदललाई जिम्मा दिएको छ । सर्वसम्मतिको सम्भावना छ । हामी आजै टुंगो लगाउँदै छौँ । टुंगो लगाउन सकिएन भने भोलि निर्वाचन हुनेछ । त्यसकारण पनि आजै टुंगो लगाउने कसरतमा हामी जुटेका छौँ ।”
शुक्रबारको निर्वाचन कार्यतालिका स्थगन गरी सर्वसम्मतको गृहकार्यका निम्ति कार्यदल गठन गरिएको थियो । कांग्रेस संसदीय दलको नेताका निम्ति अर्जुननरसिंह केसी, भीष्मराज आङ्देम्बे, मोहन आचार्य, बासना थापा र निश्कल राई आकांक्षी छन् । संसदीय दलको नेतामा दाबी गरेकी सांसद थापाले अहिलेसम्म कोही पछि नहटेको बताइन् ।
“हामी आकांक्षा राख्ने सबैले माइन्ड मेकअप गरेका छौँ,” उनले भनिन्, “सर्वसम्मतिको प्रयास कार्यदलले जारी राखेको छ । (आइतबार) बेलुकासम्म टुंगो लाग्नेछ ।” प्रतिनिधिसभामा सहभागी ६ दलमध्ये कांग्रेसले मात्र संसदीय दलको नेता टुंगो लगाउन सकेको छैन ।
