पोखरा । कास्कीको पोखरा अन्तर्राष्ट्रिय विमानस्थलबाट फ्लाई दुबईको उडानमार्फत वैदेशिक रोजगारीमा जाने नेपाली श्रमिकका निम्ति यहीँ नै स्वास्थ्य परीक्षण हुने भएको छ । फ्लाई दुबईको उडानमार्फत वैदेशिक रोजगारीमा जानेका निम्ति पोखरामा स्वास्थ्य परीक्षण सेवा सुरु गरिएको हो ।
पोखरा स्वास्थ्य विज्ञान प्रतिष्ठान (पश्चिमाञ्चल क्षेत्रीय अस्पताल)ले आवश्यक कार्यविधि तयार गरी यही कात्तिक १ गतेदेखि यो सेवा सञ्चालनमा ल्याएको छ । युवा, श्रम तथा रोजगार मन्त्रालयले पोखराबाट गन्तव्य मुलुकतर्फ जाने नागरिकको स्वास्थ्य परीक्षण स्थानीय तहमै गर्ने गरी व्यवस्था मिलाउन पत्राचार गरेपछि प्रतिष्ठानले तत्काल कार्यविधि निर्माण गरी सेवा कार्यान्वयनमा ल्याएको हो ।
पोखराबाट फ्लाई दुबईले अन्तर्राष्ट्रिय उडान सञ्चालन गरेसँगै यस क्षेत्रबाट रोजगारीका निम्ति विदेशिने मानिसलाई सहज बनाउन सेवा सुरु गरिएको प्रतिष्ठानका निर्देशक डा. झपिन्द्र पोखरेले बताए । पोखरा र आसपासका जिल्लाका नागरिक यसअघि स्वास्थ्य परीक्षण तथा उडानका निम्ति काठमाडौं धाउनुपर्ने बाध्यता थियो ।
