काठमाडौं । नेपाल बैंक लिमिटेडले आफ्ना क्रेडिट कार्ड प्रयोगकर्तालाई १८ महिनासम्म ब्याजरहित किस्ताबन्दीमा सामान खरिद गर्न सक्ने सुविधा सुरु गरेको छ । बैंक स्थापनाको ९०औँ वार्षिकोत्सवको अवसरमा बैंकले बीएनपीएल (Buy Now Pay Later) प्लेटफर्ममा आबद्ध हुँदै उक्त सुविधा सञ्चालनमा ल्याएको हो ।
नेपाल बैंक लिमिटेड र फिन्तारा सोलुसन्स प्रा.लि.बीच भएको सम्झौताअनुसार बैंकका क्रेडिट कार्ड प्रयोगकर्ताले उक्त प्लेटफर्ममार्फत १८ महिनासम्मको किस्ताबन्दीमा सामान खरिद गर्न सक्नेछन् । यसरी सामान खरिद गर्दा ग्राहकले कुनै ब्याज तथा सेवा शुल्क तिर्नुपर्ने छैन ।
सम्झौतामा सोमबार बैंकको प्रधान कार्यालय काठमाडौंमा आयोजित कार्यक्रममा नेपाल बैंकका प्रमुख कर्जा अधिकृत प्रदीपकुमार पाठक र फिन्तारा सोलुसन्सका कार्यकारी निर्देशक आशिषकुमार शर्माले हस्ताक्षर गरेका हुन् ।
नेपाल बैंक लिमिटेड आगामी कात्तिक ३० गते ९०औँ वर्षमा प्रवेश गर्दैछ । बैंकले युवा जनशक्ति र आधुनिक प्रविधिको प्रयोगमार्फत देशभर छिटोछरितो तथा गुणस्तरीय बैंकिङ सेवा प्रदान गर्दै आएको जनाएको छ ।
