काठमाडौं। नेपाल प्रिमियर लिग (एनपीएल) मा सट्टाबाजी गर्ने कार्यमा संलग्न ८ जना भारतीय नागरिक राजधानीको बल्खु क्षेत्रबाट पक्राउ परेका छन्। अनलाइन बेटिङ साइटमार्फत खेल हारजित हुने गरी सट्टेबाजी गराएको आरोपमा उनीहरुलाई नियन्त्रणमा लिइएको काठमाडौं उपत्यका अपराध अनुसन्धान कार्यालयले जनाएको छ।
अपराध अनुसन्धान कार्यालयको टोलीबाट पक्राउ पर्नेमा भारतीय नागरिकहरु राजा यदुला, महेश बाबु, पण्डित श्रीनिवासुलु, सेख सोयब, नभिन मड्डेला, महमद रफी सेख, साइ कुमार तम्मिसेट्टी र सेख चन्द बसल रहेका छन्। उनीहरूमाथि सट्टाबाजी गराउन नहुने कसुरमा आवश्यक अनुसन्धान भइरहेको प्रहरीले जनाएको छ । यसअघि पनि खेलाडीलाई म्याच फिक्सिङ गर्न उक्साएको आरोपमा २ जना पक्राउ परेका थिए ।
