काठमाडौं l संयुक्त राष्ट्रसंघीय क्षेत्रीय शान्ति तथा निशस्त्रीकरण केन्द्र, एसिया तथा प्रशान्त (UNRCPD) ले १६ अप्रिल २०२५ मा अक्सफोर्ड डिप्लोम्याटिक सोसाइटीको प्रतिनिधिमण्डललाई काठमाडौंस्थित युएन हाउसमा स्वागत गरेको छ। यो भ्रमण सोसाइटीको १० दिने नेपाल भ्रमणको एउटा हिस्सा थियो।
विभिन्न शैक्षिक र व्यावसायिक पृष्ठभूमि भएका स्नातकोत्तर विद्यार्थी तथा पेशाकर्मीहरू सम्मिलित प्रतिनिधिमण्डलले संयुक्त राष्ट्रसंघको निशस्त्रीकरण प्रयास र एसिया-प्रशान्त क्षेत्रमा केन्द्रको शान्ति तथा सुरक्षामा योगदानबारे गहिरो जानकारी लिन युएनआरसीपीडीको भ्रमण गरेको हो।
कार्यक्रमको दौरान युएनआरसीपीडीका निर्देशक श्री दीपायन बसु रायले संयुक्त राष्ट्रसंघको निशस्त्रीकरण ढाँचा, यूएनओडीएको विश्वव्यापी म्यान्डेट तथा केन्द्रले सञ्चालन गरिरहेका क्षेत्रीय पहल र परियोजनाहरूका बारेमा विस्तृत प्रस्तुति दिनुभयो।
यसपछि भएको जिज्ञासा सत्रमा परम्परागत हतियार नियन्त्रण, क्षेत्रीय सहकार्य संयन्त्रहरू, र निशस्त्रीकरण प्रवर्द्धनमा नागरिक समाज तथा युवाको महत्वपूर्ण भूमिकाजस्ता विषयहरूमा रोचक छलफल भयो। सहभागीहरूले बहुपक्षीयता, नीति कार्यान्वयन र आजको जटिल सुरक्षा वातावरणमा निशस्त्रीकरण कूटनीतिमा आउने व्यावहारिक चुनौतीहरूबारे सोधपुछ गर्दै प्रत्यक्ष रूपमा श्री दीपायनसँग संवाद गरे।
भ्रमणले शैक्षिक अनुसन्धान र बहुपक्षीय निशस्त्रीकरण कार्यबीच पुलको भूमिका खेल्दै, क्षेत्रीय शान्ति र सुरक्षासम्बन्धी विकसित हुँदै गएका चुनौतीहरूमा संवादको महत्वपूर्ण अवसर प्रदान गर्यो।
युएनआरसीपीडीले अक्सफोर्ड डिप्लोम्याटिक सोसाइटीलाई भ्रमण र सक्रिय सहभागिताको लागि हार्दिक धन्यवाद व्यक्त गरेको छ र भविष्यमा शैक्षिक संस्थाहरू सँगको सहकार्य तथा निशस्त्रीकरण क्षेत्रमा भावी नेतृत्वकर्ताहरूलाई प्रेरित गर्ने प्रयासलाई निरन्तरता दिने प्रतिवद्धता जनाएको छ।
