काठमाडौं । ग्यालेक्सी फिटनेसको नयाँ शाखा काठमाडौंको बालाजुमा सञ्चालनमा आएको छ । सोमबार नेपाली क्रिकेट टिमका सदस्य कुशल भुर्तेलले शाखाको उद्घाटन गरेका हुन् । सोही अवसरमा कुशललाई ग्यालेक्सी फिटनेसको ब्रान्ड एम्बासडरमा नियुक्त गरिएको छ । सम्झौतापत्रमा कुशल र ग्यालेक्सी फिटनेसका प्रबन्ध निर्देशक दीपकप्रसाद अधिकारीले हस्ताक्षर गरेका थिए ।
कुशल र ग्यालेक्सीबीच एक वर्षको सम्झौता भएको हो । कुशलले ग्यालेक्सी फिटनेससँगको सहकार्यले आफूलाई थप हौसला मिलेको बताए । "खेलाडीलाई फिटनेस अत्यावश्यक छ । फिट हुन जिम गर्नै पर्छ । त्यसैले ग्यालेक्सी फिटनेस परिवारमा जोडिन पाउँदा खुसी छु," भुर्तेलले भने ।
ग्यालेक्सी फिटनेसका प्रबन्ध निर्देशक अधिकारीले कुशलजस्ता स्टार क्रिकेटरलाई ब्रान्ड एम्बासडरका रूपमा स्वागत गर्न पाउँदा आफूहरू उत्साहित भएको बताए । "कुशल भुर्तेलजस्तो क्रिकेटका स्टारलाई ब्रान्ड एम्बासडरका रूपमाहाम्रो परिवारमा भित्र्याउन सक्नु ठूलो सफलता हो । यसले हामीलाई पनि खेलकुदसँग जोडिएर काम गर्न थप उत्साह थपेको छ," प्रबन्ध निर्देशक अधिकारीले भने ।
कुशलसँगको सहकार्यले खेलकुद र फिटनेसलाई जोड्न तथा स्वस्थ जीवनशैलीप्रति जनचेतना अभिवृद्धि गर्न सहयोग पुग्ने कम्पनीको विश्वास छ ।
