काठमाडौं । आज १ सय १५ औँ अन्तर्राष्ट्रिय श्रमिक महिला दिवस, विश्वभर विभिन्न कार्यक्रम गरी सम्पन्न भएकाे छ । सबै महिला तथा बालिकाको लागि : अधिकार, समानता र सशक्तिकरण भन्ने मूल नारासहित नेपालमा पनि मनाइएकाे हो ।
हरेक वर्ष मार्च ८ तारिखमा अन्तर्राष्ट्रिय श्रमिक महिला दिवस मनाउने गरिन्छ । नेपालमा लैंगिक समनता र महिला अधिकारको प्रवर्द्धमा यो दिवसले महत्वपूर्ण योगदान दिएको छ । आजको दिनमा महिला सशक्तिकरणलाई प्रोत्साहन गर्ने र लैंगिक विभेद हटाउने सवालमा देशभर विभिन्न कार्यक्रम गरिएकाे छ । महिला, बालबालिका तथा ज्येष्ठ नागरिक मन्त्रालयले दिवसका अवसरमा आज प्रहरी प्रधान कार्यालयमा विशेष कार्यक्रम गरेकाे छ ।
नारी मुक्ति आन्दोलनकी अभियन्ता क्लारा जेट्किनले सन् १९११ मार्च ८ मा महिला कामदारमाथि भएको श्रम शोषणविरुद्ध आवाज उठाएको दिनको स्मरणमा विश्वभर दिवस मनाउने प्रचलन छ । सन् १९०६ मा सम्पन्न महिलाहरूको प्रथम अन्तर्राष्ट्रिय सम्मेलनबाट क्लारा जेट्किन सचिव बन्नुभयो । त्यसपछि १९०८ मार्च ८ मा अमेरिकाको सिकागो सहरमा समान अधिकारको माग राखेर महिलाहरूले हडताल गरे । महिला अधिकारको माग गर्दै भएको सोही आन्दोलनको स्मरण तथा महिला अधिकारको संघर्षको दिनका रूपमा ८ मार्चलाई लिने गरिन्छ ।
नेपालमा शिक्षा, स्वास्थ्य, आर्थिक सशक्तिकरण तथा नेतृत्वमा महिला सहभागिता बढे पनि त्यो पर्याप्त नभएको सरोकारवालाको गुनासो छ । त्यसैले महिला समानताको लक्ष्यलाई वास्तविक कार्यान्वयमा ल्याउन हातेमालो गर्दै जाने सवालमा यो दिवस महत्वपूर्ण मानिन्छ ।
