काठमाडौं । संघीय निजामती सेवा विधेयकमा भएको गठबडीबारे छानबिन गर्न गठित संसदीय विशेष छानबिन समितिले संघीय संसद सचिवालयका महासचिव पद्मप्रसाद पाण्डेयसँग सोधपुछ गरेको छ । सिंहदरवारस्थित समितिको सभाकक्षमै पाण्डेसँग सोधपुछ भएको हो ।
प्रतिनिधिसभा अन्तर्गतको राज्य व्यवस्था तथा सुशासन समितिले सरकारी कर्मचारीका लागि अवकाश पाएको वा राजीनामा दिएको २ वर्षसम्म संवैधानिक, कुटनतिक र अन्य नियुक्ति लिन अयोग्य हुने विषयमा सहमति जुटाएको थियो । यसअनुसार निजामती सेवा विधेयकमा प्रावधान राखिएको छ ।
तर, २ वर्षसम्म कुलिङ पिरियड लागू हुने प्रावधानलाई निश्कृय बनाउने भाषा समेत विधेयकको प्रतिवेदनमा सँगै परेको भनेर प्रश्न उठेपछि संसदीय विशेष छानबिन समिति बनेको हो । नेपाली कांग्रेसका सांसद जीवन परियारको सभापतित्वमा गठित समितिले संघीय संसद सचिवालयका महासचिव पाण्डेयसँग समेत सोधपुछ गरेको हो ।
