काठमाडौं । अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी चिनफिङबीच बिहीबार ह्वाइट हाउसमा शिखर वार्ता हुँदै छ । दुई महाशक्ति राष्ट्रबीचको सम्बन्धमा तनाव कायम रहेका बेला हुन लागेको यस वार्तामा व्यापार, इरान, ताइवान र कृत्रिम बुद्धिमत्ता (एआई) लगायतका जटिल विषयमा छलफल हुने अन्तर्राष्ट्रिय सञ्चारमाध्यमहरूले जनाएका छन् ।
इरान र मध्यपूर्वको द्वन्द्व
वार्तामा इरानमा जारी युद्ध तथा मध्यपूर्वको सुरक्षा अवस्था प्रमुख विषय बन्नेछन् । अमेरिकी सिनेटर रोजर विकरले राष्ट्रपति ट्रम्पलाई चीनले इरानलाई दिएको स्पष्ट समर्थनको विषय उठाउन आग्रह गरेका छन् ।
अमेरिका विगत सात महिनादेखि जारी इरान युद्ध अन्त्य गर्न चीनले आफ्नो प्रभाव प्रयोग गरोस् र इरानलाई अमेरिकी सर्तहरू स्वीकार गर्न तयार पारोस् भन्ने चाहेको छ । तर, चीनले हालसम्म यसमा अमेरिकी आग्रह स्वीकार गरिसकेको छैन ।
ताइवान र अमेरिकी हतियार बिक्री
अमेरिका र चीनबीच ताइवान लामो समयदेखि असहमतिको केन्द्रमा रहँदै आएको छ । वार्तामा ताइवानप्रति चीनको रणनीति र अमेरिकाले गर्दै आएको हतियार बिक्रीबारे संवाद हुने अपेक्षा गरिएको छ ।
सञ्चारमाध्यमहरूका अनुसार, चिनियाँ राष्ट्रपति सीले ताइवानलाई हतियार बिक्री रोक्न तथा अत्याधुनिक चिप्स निर्यातमा लगाइएको अमेरिकी प्रतिबन्धमा लचकता अपनाउन ट्रम्पसँग आग्रह गर्ने सम्भावना छ ।
व्यापार युद्ध र ट्यारिफ
व्यापारिक विवादका बीच दुवै देशले गत वर्ष दक्षिण कोरियाको बुसानमा भएको व्यापारिक सहमतिको अवधि थप दुई महिना लम्ब्याउने सहमति गरेका छन् । नोभेम्बर १० मा समाप्त हुन लागेको उक्त व्यापारिक ‘ट्रुस’लाई अब जनवरी १० सम्म कायम राखिने अमेरिकी अर्थमन्त्री स्कट बेसेन्टले बताएका छन् ।
राष्ट्रपति सी चिनफिङ र उनकी पत्नी पेङ लियुआन बुधबार वासिङ्टन आइपुग्दा राष्ट्रपति ट्रम्प र प्रथम महिला मेलानिया ट्रम्प उनीहरूको स्वागतका लागि जोइन्ट बेस एन्ड्रयुज पुगेका थिए ।
एआई र प्रविधि
अत्याधुनिक चिप्स र एआई प्रविधिको राष्ट्रिय सुरक्षा जोखिमलाई लिएर दुवै देशबीच लामो समयदेखि मतभेद छ । ह्वाइट हाउसमा आयोजना हुने राजकीय भोजमा प्रविधि क्षेत्रका दिग्गजहरू– एनभिडियाका प्रमुख कार्यकारी अधिकृत (सीईओ) जेन्सेन ह्वाङ र स्पेसएक्सका प्रमुख एलन मस्कलगायत सहभागी हुँदैछन् ।
एआईको सुरक्षा जोखिम न्यूनीकरणका लागि अमेरिका र चीनबीच गम्भीर एआई घटनाहरूको सूचना आदानप्रदान गर्न नयाँ ‘सूचना प्रणाली’ स्थापना गर्ने प्रस्ताव अघि सारिएको छ । अमेरिकी अर्थमन्त्री बेसेन्टका अनुसार, यो संयन्त्र ‘अमेरिका–चीन एआई संवाद’ अन्तर्गत रहनेछ । यद्यपि, अत्याधुनिक एआई चिप्स र सेमिकन्डक्टर उपकरणको निर्यात प्रतिबन्धबारे ठोस सहमति हुन भने बाँकी नै छ ।
