काठमाडौं । नेकपा (एमाले)का अध्यक्ष केपी शर्मा ओलीले केही व्यक्तिले आफूलाई विस्थापित गर्ने बेमौसमी बाजा बजाइरहेको टिप्पणी गरेका छन् । सोमबार (असोज ५) सुरु भएको केन्द्रीय कमिटी बैठकमा प्रस्तुत गरेको राजनीतिक प्रतिवेदनमा युवालाई वास्तविक जिम्मेवारीमा ल्याउने सुरक्षित र बाटो बनाउन चाहेको उल्लेख गरेका छन् ।
“युवालाई वास्तविक जिम्मेवारीमा ल्याउने सुरक्षित र वास्तविक बाटो बनाउन चाहन्छु । अनुभवलाई अपमान गरेर होइन, नयाँ ऊर्जालाई जोडेर नेतृत्व विकास गर्नुपर्छ । काम गरेर, सिकेर, जिम्मेवारी लिएर नेतृत्व विकास हुन्छ,” ओलीको प्रतिवेदनमा उल्लेख छ ।
उनले आफूलाई हटाउनका लागि पुनर्गठनको नारा उछालिएको आरोप लगाएका छन् । “यो जिद्दीको प्रश्न होइन । पार्टीको पुनर्निर्माण र संक्रमणलाई संस्थागत बनाउने जिम्मेवारीको प्रश्न हो । तर, यतिबेला केही व्यक्तिहरूले अध्यक्ष विस्थापित गर्ने मनसाय र प्रयासका बेमौसमी बाजा बजाइरहेको पाइएको छ र त्यसका लागि पुनर्गठनको नारा उछालिएको छ,” ओलीले भनेका छन् ।
उनले पुनर्गठन रहर र लहडले नहुने दाबी समेत गरेका छन् । ओलीले अहिलेको अवस्थामा पुनर्गठनको शब्दार्थ र भावार्थ नमिल्ने दाबी समेत गरेका छन् ।
