काठमाडौं । सन् २०१२ मा स्थापना भएको एम्बार्क अनम्याथले गणित शिक्षालाई परम्परागत पाठ्यपुस्तकमा सीमित नराखी व्यावहारिक जीवनसँग जोड्दै विद्यार्थीलाई रोचक ढंगले सिकाउने अभियानलाई निरन्तरता दिँदै आएको छ। यही अभियानअन्तर्गत अनम्याथ टिमले भदौ १८ देखि २३ गतेसम्म रुपन्देहीको भैरहवा र बुटवल क्षेत्रमा व्यापक पहुँच कार्यक्रम सम्पन्न गरेको छ।
कार्यक्रमअन्तर्गत २५ भन्दा बढी विद्यालयमा पुगेर गणित शिक्षालाई अझ सजिलो र प्रभावकारी बनाउन सकिने नयाँ विधिहरूको परिचय गराइएको थियो। विद्यालयका प्रधानाध्यापक, शैक्षिक संयोजक र शिक्षकहरूसँग प्रत्यक्ष भेटघाट गरी गतिविधिनिर्मुखी शिक्षण विधिबारे छलफल गरिएको थियो। एम्बार्क अनम्याथका मार्केटिङ तथा व्यापार विकास प्रबन्धक प्रज्वल पोखरेलले कार्यक्रममा बोल्दै गणितलाई डर लाग्दो होइन, रोचक र जीवनोपयोगी विषयका रूपमा प्रस्तुत गर्ने अनम्याथको उद्देश्य रहेको बताए। उनका अनुसार यस्तो कार्यक्रमले विद्यालयहरूको आवश्यकता बुझ्न र त्यसअनुसार समाधान तयार गर्न मद्दत गर्नेछ।
अनम्याथ टिमले कार्यक्रममा अनुभवमूलक सिकाइ कार्यक्रमहरू—जस्तै अनम्याथ जिल्ला योजना, गणितको कथा भन्ने, उद्यमशील गणित र म्याथ म्युजियम—को परिचय गराएको थियो। शिक्षकहरूसँग भएको अन्तरक्रियामा पुरानो शैलीको गणित शिक्षणले विद्यार्थीमा जिज्ञासा कम गर्ने भएकाले गतिविधिमूलक र प्रयोगात्मक सिकाइ अपनाउनुपर्नेमा जोड दिइएको थियो। लुम्बिनी वर्ल्ड स्कूलका योग तथा प्राणायाम प्रशिक्षक शिवसुन्दर पोखरेलले गणितलाई व्यावहारिक र जीवनसँग जोड्ने अनम्याथको प्रयास विद्यार्थीहरूका लागि उपयोगी र प्रभावकारी हुने विश्वास व्यक्त गरे।
यस अभियानले रुपन्देहीका विभिन्न विद्यालयमा ठूलो चासो जगाएको छ। धेरै विद्यालयहरूले प्रयोगात्मक कक्षा सञ्चालन गर्ने तथा आफ्ना आवश्यकता अनुसार योजना बनाउन प्रस्ताव गरेका छन्। शिक्षकहरूले अनम्याथको अन्तरक्रियात्मक शैली र गुणस्तरीय शिक्षाप्रतिको प्रतिबद्धताको प्रशंसा गरेका छन्।
अनम्याथ टिमले आगामी दिनमा प्रयोगात्मक कक्षा विस्तार गर्ने, इच्छुक विद्यालयहरूसँग निरन्तर सम्पर्क राख्ने र विद्यालयको आवश्यकता अनुसार विशेष योजना निर्माण गर्ने लक्ष्य लिएको छ। यसमार्फत लामो अवधिसम्म रुपन्देहीका कक्षाकोठामा नयाँ र प्रभावकारी गणित शिक्षण पद्धति स्थापित गर्ने अपेक्षा गरिएको छ।
