कैलाली । आगामी फाल्गुनमा सम्पन्न हुन गइरहेको प्रतिनिधि सभा निर्वाचनका लागि नेपाली कम्युनिष्ट पार्टी (नेकपा) बाट कैलाली निर्वाचन क्षेत्र नं. २ को प्रतिनिधि सभा समानुपातिकतर्फ बबिता पाण्डे उम्मेदवारका रूपमा सिफारिस भएकी छन्। उनको सिफारिससँगै पार्टीभित्र तथा स्थानीय राजनीतिक वृत्तमा सकारात्मक चर्चा सुरु भएको छ।
युवा संघ नेपालकी सक्रिय महिला नेत्री तथा समाजसेवी पाण्डे नेपाल जेसिजकी निवर्तमान राष्ट्रिय उपाध्यक्षसमेत हुन्। उनी सानै उमेरदेखि सामाजिक सेवा, युवासशक्तीकरण र राजनीतिक गतिविधिमा निरन्तर सक्रिय रहँदै आएकी छन्। स्पष्ट विचार, निडर अभिव्यक्ति र जिम्मेवारीलाई कुशलतापूर्वक निर्वाह गर्ने क्षमताका कारण उनी पार्टीभित्र मात्र होइन, समाजमा पनि प्रभावशाली व्यक्तित्वका रूपमा परिचित छन्।
कैलाली निर्वाचन क्षेत्र नं. २ अन्तर्गत विभिन्न सामाजिक संघसंस्था, युवा संगठन तथा राजनीतिक अभियानमा नेतृत्वदायी भूमिका निर्वाह गर्दै आएकी पाण्डेले स्थानीय तहदेखि राष्ट्रिय तहसम्मको अनुभव बटुलेकी छन्। उनले महिला, युवा तथा सीमान्तकृत समुदायका सवाललाई प्राथमिकतामा राख्दै आवाज उठाउँदै आएकी छन्। यही कारण उनको उम्मेदवार सिफारिसलाई युवाको क्षमता, मेहनत र योगदानको उचित मूल्यांकनका रूपमा हेरिएको छ।
राजनीतिमा युवाको अर्थपूर्ण सहभागिता आवश्यक रहेको सन्दर्भमा पाण्डेको सिफारिसले नयाँ पुस्ताको नेतृत्व स्थापित हुने अपेक्षा गरिएको छ। पार्टी कार्यकर्ता तथा शुभेच्छुकहरूले उनको राजनीतिक यात्रा अब सिफारिसमा मात्र सीमित नरही जिम्मेवार र स्थापित नेतृत्वका रूपमा अघि बढ्ने विश्वास व्यक्त गरेका छन्।
पार्टीभित्र अनुशासन, संगठनप्रतिको प्रतिबद्धता र समाजप्रतिको उत्तरदायित्वलाई आत्मसात गर्दै अघि बढेकी पाण्डेलाई आगामी निर्वाचन प्रक्रियामा सफलताको कामना गरिएको छ। उनका समर्थकहरूले यस सिफारिसलाई कैलालीको राजनीतिक विकास र युवामैत्री नेतृत्वतर्फको महत्वपूर्ण कदमका रूपमा लिएका छन्।
