काठमाडौं। साताको कारोबारको तेस्रो दिन मंगलबार सेयर बजार परिसूचक नेपाल स्टक एक्सचेञ्ज (नेप्से) १५.७० अंकले बढेर २५६६.०७ बिन्दुमा पुगेको छ । अघिल्लो कारोबार दिन सोमबार पनि नेप्से ९.७८ अंकले बढेर २५५०.३६ बिन्दुमा कायम थियो ।
मंगलबार नेप्सेमा कुल ४ अर्ब १० करोड रुपैयाँ बराबरको कारोबार भएको छ । अघिल्लो दिन सोमबार भने नेप्सेमा ३ अर्ब ८९ करोड रुपैयाँ बराबरको कारोबार भएको थियो । मंगलबार कारोबारमा आएकामध्ये २०७ कम्पनीको सेयर मूल्य बढ्दा ४४ कम्पनीको घटेको छ । यस्तै, पाँच कम्पनीको सेयर मूल्य भने स्थिर छ ।
मंगलबार पाँच कम्पनीको सेयर मूल्य नौ प्रतिशत बढीले उकालो लाग्दा सबै समूह हरियाली बनेका छन् ।
