काठमाडौं। नेकपा (एमाले)का अध्यक्ष केपी शर्मा ओलीले बिहीबार काठमाडौंमा सम्पादकहरूसँगको अन्तर्क्रियामा बोल्दै आफू प्रधानमन्त्री निवास बालुवाटारबाट ‘भागेको’ भन्ने आरोपको प्रतिवाद गर्नुभएको छ। ओलीले आफू भागेको नभई राजनीतिक षड्यन्त्र र घेराबन्दीबाट जोगिन सुरक्षित स्थानमा सरेको बताउनुभएको हो।
उहाँले आफूलाई चौतर्फी घेराबन्दी गरेर सिध्याउन खोजिएपछि अस्तित्व रक्षाका लागि बालुवाटार छोड्नुपरेको तर्क गर्नुभयो। 'दुष्टहरूको घेराबन्दी तोड्नु पर्दो रहेछ, त्यस्ता प्रयासहरूलाई असफल पार्नु पर्दो रहेछ, जस्तो पाण्डवले पारेका थिए,’ उहाँले थप्नुभयो। उहाँले आफूमाथि भएको घेराबन्दी र आक्रमणबाट जोगिनुलाई कायरता नभई बुद्धिमत्तापूर्ण कदम भएको जिकिर गर्नुभयो।
अध्यक्ष ओलीले सुशीला कार्की नेतृत्वको वर्तमान सरकार र गठबन्धनप्रति कडा आक्रोश पोख्दै जेनजी विद्रोहपछि बनेको सरकारले देशलाई सङ्कटतर्फ धकेलेको आरोप लगाउनुभयो। सरकारको आलोचना गर्दै ओलीले भन्नुभयो, 'यो सरकार त नाग पञ्चमीमा गोबरले टाँसेको नागको फोटो जस्तै हो। कसले ल्याएर टाँसिदियो, थाहा छैन तर यसको कुनै भविष्य छैन ।’ पार्टी विभाजनपछि एमाले कमजोर भयो भन्ने विश्लेषणलाई ओलीले अस्वीकार गर्नुभयो। उहाँले आगामी चुनावमा एमाले एक्लैले बहुमत ल्याउने दाबी गर्नुभयो।
