काठमाडौं। त्रिकोणात्मक ट्वान्टी–२० अन्तर्राष्ट्रिय शृङ्खलाको आफ्नो दोस्रो खेलमा नेपालले आज (मङ्गलबार) घरेलु टोली स्कटल्याण्डसँग खेल्दै छ। स्कटल्याण्डको टिटवुड रङ्गशालामा हुने नेपाल र स्कटल्याण्डबीचको खेल नेपाली समयअनुसार राति ७ः४५ बजे सुरु हुनेछ।
नेदरल्याण्ड्ससँग सोमबार तेस्रो सुपर ओभरमा पराजित भएपछि नेपाल आज पहिलो जितको खोजीमा रहेको छ। अन्तर्राष्ट्रिय क्रिकेट इतिहासमा तेस्रो सुपर ओभरसम्म पुगेको यो खेल पहिलोपटक हो।
स्कटल्याण्ड भने प्रतियोगितामा लगातार दोस्रो जितको खोजीमा छ। स्कटल्याण्डले आफ्नो पहिलो खेलमा नेदरल्याण्ड्सलाई ३९ रनले पराजित गरेको थियो। नेपालले टी२० अन्तर्राष्ट्रिय मान्यता पाएपछि स्कटल्याण्डको सामना गर्न लागेको यो पहिलोपटक हो। त्यसअघि सन् २०१३ मा भएको आईसीसी विश्वकप क्वालिफायरअन्तर्गतको खेलमा नेपाल स्कटल्याण्डसँग ८ विकेटले पराजित भएको थियो।
