काठमाडौं । नेपाली कांग्रेसका महामन्त्री गगन थापाले मंगलबार पार्टीको केन्द्रीय कार्यालय सानेपामा अक्सफोर्ड डिप्लोम्याटिक सोसाइटीका प्रतिनिधिमण्डलसँग भेटवार्ता गर्दै नेपालको राजनीतिक संक्रमण, शिक्षा सुधार, क्षेत्रीय कूटनीति, सार्वजनिक स्वास्थ्य, र जलवायु सहनशीलता लगायतका विषयमा छलफल गरेका छन्।
भेटका क्रममा थापाले सशस्त्र द्वन्द्वपछिको नेपालको लोकतान्त्रिक यात्राबारे तथा संविधान जारीपछिको संक्रमणकालीन अवस्थाबारे प्रतिनिधिमण्डललाई जानकारी गराएका थिए। उनले संस्थागत सुदृढीकरण, समावेशी शासन प्रणाली सुनिश्चित गर्ने प्रयासहरू, र प्रमुख क्षेत्रहरूमा सुधार ल्याउने पहलहरूबारे पनि प्रकाश पारे।
थापाले नेपालको लोकतान्त्रिक प्रक्रियामा प्रतिनिधिमण्डलले देखाएको चासोप्रति कृतज्ञता व्यक्त गरे। उनले भने, "नेपालको राजनीतिक र विकास यात्राप्रति विश्वका युवा नेतृत्वकर्ताहरूको समर्थन र वास्तविक चासोलाई हामी उच्च मूल्यांकन गर्छौं। यस्ता भ्रमणहरूले आपसी समझदारी र भविष्यका सहकार्यहरूलाई थप सुदृढ बनाउन महत्वपूर्ण भूमिका खेल्छ।"
भेटवार्तामा शिक्षा क्षेत्र सुधार, क्षेत्रीय कूटनीतिमा नेपालको भूमिका, आर्थिक पुनःउत्थान तथा सार्वजनिक स्वास्थ्य प्रवर्द्धनका रणनीतिहरू, र जलवायु सहनशीलता निर्माणका पहलहरूबारे मुख्य छलफल भएको थियो।
प्रतिनिधिमण्डलले नेपालको राजनीतिक प्रगतिप्रति प्रशंसा व्यक्त गर्दै उदाउँदा लोकतन्त्र र अन्तर्राष्ट्रिय संस्थाबीच निरन्तर संवाद र सहकार्य आवश्यक रहेकोमा जोड दिए। भेटवार्ता भविष्यमा थप अन्तरक्रिया र विकास तथा शासनसम्बन्धी महत्वपूर्ण विषयहरूमा ज्ञान आदानप्रदानलाई प्रवर्द्धन गर्ने आपसी समझदारीसहित सम्पन्न भएको थियो।
अक्सफोर्ड डिप्लोम्याटिक सोसाइटीको नेपाल भ्रमण दक्षिण एसिया अध्ययन कार्यक्रमको हिस्सा हो, जसको उद्देश्य नीति निर्माताहरूसँग अन्तरक्रिया गर्दै क्षेत्रीय राजनीतिक विकासलाई बुझ्नु रहेकाे बताइएकाे छ ।
