काठमाडौं। नवलपुरको कावासोती आठस्थित पूर्व पश्चिम राजमार्गको खरकट्टा जङ्गलमा डण्डाबाट नारायणगढतर्फ जाँदै गरेको ना ४ ख ७७७६ नं. को बस अनियन्त्रित भएर बिच सडकमै पल्टिँदा १३ जना घाइते भएका छन् ।जिल्ला प्रहरी कार्यालय नवलपुरका सूचना अधिकारी प्रहरी नायब उपरीक्षक मधु नेपालका अनुसार बस तीव्र गतिका कारण अनियन्त्रित भएर बिच सडकमै पल्टिएको हो ।
बसमा करिब २५ जना सवार रहेको र दुर्घटनामा परेर १३ जना घाइते भएको सूचना अधिकारी नेपालले जनाएको छ । घाइतेहरुलाई भरतपुर र कावासोतीका अस्पतालमा पठाइएको प्रहरीले जनाएको छ । घाइतेहरुमध्ये देवचुली नगरपालिका १४ प्रगतिनगर निवासी ६५ वर्षीय महिला विष्णु विक र चितवनको भरतपुर महानगरपालिका २१ निवासी ७० वर्षीय पुरुष दीपबहादुर भट्टराइको मध्यबिन्दु प्रादेशिक अस्पताल डण्डामा उपचार भइरहेको छ ।
त्यसैगरी ७ जनाको कावासोतीमा रहेको नवलपुर अस्पतालमा उपचार भइरहेको छ । नवलपुर अस्पतालमा कावासोती ८ निवासी १४ वर्षीय उत्कृष्ट पोख्रेल, कावासोती ८ कै ६३ वर्षीय राजकुमार सिग्देल, बाराको कैलाली उपमहानगरपालिका १९ निवासी १७ वर्षीय सलमान खान, चितवनको भरतपुर महानगरपालिका ५ निवासी १२ वर्षीया बालिका सदिक्षा वाग्ले, नवलपुरको हुप्सेकोट ४ निवासी २४ बर्षीया श्वेता आले, हुप्सेकोट ४ कै २२ वर्षीया जमुना रेश्मी र ३७ वर्षीया नरमाया आलेको उपचार भइरहेको छ ।
