काठमाडौं । नेकपा (एमाले), नेकपा (माओवादी केन्द्र), नेकपा (एकीकृत समाजवादी)मा आबद्ध २८ युवाले दलहरूको पुनर्गठनका लागि दोस्रो र तेस्रो तहका नेताहरूलाई घच्घच्याएका छन् । एमाले केन्द्रीय सदस्यद्वय उषाकिरण तिम्सिना, अरविन्द सिंहसहितका युवाले दलहरूलाई पुनर्गठन गर्ने काममा ढिलाइ नगर्न सबै राजनीतिक दलका दोस्रो/तेस्रो तहका नेताहरूलाई आग्रह गरेका हुन् ।
उनीहरूले जेनजी आन्दोलनको सन्देशअनुसार अघि बढ्न संयुक्त आह्वान गरेका हुन् । “दलहरूमा अलमल, पुरानै नेताहरूको निरन्तरता, समाजमा अन्योल, निराशा र आक्रोश बढाउने शक्तिहरूको बोलबाला, बाहिरी शक्तिहरूको चलखेल र अस्थिरताको दुश्चक्र अर्को बाटो हो । राजनीतिलाई लोकतान्त्रिक प्रक्रियामा अघि बढाउन दलहरूको पुनर्गठन आजको मुख्य सर्त हो,” आह्वानमा भनिएको छ ।
नेतृत्वमा बसेर राजनीतिलाई असफल बनाइरहेका मुख्य नेताहरूलाई बिदा नगरिकन दलहरूको पुनर्गठन हुन नसक्ने निष्कर्ष युवाहरूको छ ।
